3 years ago
भारतका विभिन्न ठाउँमा बर्डफ्लु देखिएपछि नेपाल सरकारले बर्ड फ्लु नेपाल भित्रिन नदिन तत्कालका लागि कुखुरा तथा मासुजन्य वस्तु आयातमा रोक लगाएको छ ।
कृषि तथा पशुपंक्षी विकास मन्त्रालय अन्तर्गतको पशुसेवा विभागले देशभरका आठवटा क्वरेण्टीन कार्यालयलाई पत्र पठाएर आयातमा रोक लगाउन निर्देशन दिएको छ ।
भारतमा विगत १ सातादेखि हजारौं संख्यामा चरा तथा हाँसहरू मर्न थालेपछि नेपालमा पनि सर्तकता स्वरूप यस्तो कदम चालिएको हो । बर्ड फ्लु भित्रिन नदिन अहिले विभिन्न ठाउँमा पशु क्वरेण्टीन कार्यालयले जाँच गर्न थालिसकेको मन्त्रालयले जनाएको छ ।
कृषि तथा पशुपन्छी विकास मन्त्रालयले सूचना जारी गर्दै कुनै पनि पक्षी तथा मासुजन्य वस्तुहरू देशबाहिर निर्यात तथा आयात गर्न बन्द गरिएको जनाएको छ ।
मन्त्रालयले पशु सवास्थ्य तथा पशु सेवा ऐन २०५५ बमोजिम हालका लागि आयात निर्यात बन्द गरेको मन्त्रालयका प्रवक्ता डा. श्रीराम घिमिरेले बताएउनु भयो । यदि कसैले अवैध रूपमा मासुजन्य वस्तु भित्र्याएको पाइएमा बर्डफ्लु रोग निर्देशिका आदेश २०६४ बमोजिम कारबाही हुने उहाँले जानकारी दिनुभयो।
