3 years ago
नेपाल पत्रकार महासंघ काठमाडौं शाखाले अग्रज सञ्चारकर्मीहरुलाई विशेष कोभिड राहत एवं मासिक रुपमा जीवन निर्वाह भत्ताको व्यवस्था गर्न माग गरेको छ ।
मंगलबार सिंहदरबारमा सञ्चार तथा सूचना प्रविधि मन्त्री माननीय पार्वत गुरुङलाई १६ बुँदे ज्ञापन पत्र बुझाउदै महासंघ काठमाडौंले ६० वर्ष उमेर पुगेका र २५ वर्ष भन्दा बढी समय निरन्तर पत्रकारिता गरिसकेका जेष्ठ तथा अग्रज सञ्चारकर्मीहरुलाई विशेष कोभिड राहत एवं मासिक रुपमा जीवन निर्वाह भत्ताको व्यवस्था गर्न सरकारको ध्यानाकर्षण गराएको हो ।
त्यस्तै समानुपातिक विज्ञापन नीति लागु नहुन्जेलका लागि स्थानीय र प्रदेश तहबाट उपलब्ध गराइने विज्ञापन समानुपातिक ढँगले वितरण गर्ने व्यवस्थाका लागि नीतिगत कदम चाल्न पनि सो शाखाले माग गरको छ ।
ठूला संचार गृहहरुमा अहिलेसम्म श्रमजीवी पत्रकार ऐन लागू हुन नसकेको भन्दै तत्काल सरकारले हस्तक्षेप गरि ऐन लागू गराउन माग गरिएको शाखाका अध्यक्ष शान्ताराम बिडारीले जानकारी दिनुभयो ।
त्यस्तै उहाँले सूचना विभागको परिचयपत्र भएका संचारकर्मी र संचालनमा रहेका संचारगृहलाई निःशुल्क इन्टरनेट सुविधा उपलब्ध गराउनुका साथै ‘एक संचारगृह, एक सवारी साधन’को व्यवस्था गरी भन्सार छुटको नीति ल्याउन माग गरिएको जानकारी बताउनु भयो ।
ज्ञापन पत्र बुझ्दै मन्त्री गुरुङले महासंघको माग सकारात्मक रहेको बताउनु भयो । त्यस्तै उहाँले परिवर्तित सन्दर्भमा सञ्चारकर्मीले सन्तुलन र सहि सूचना सम्प्रेषण गर्नुपर्नेमा जोड दिनुभयो ।
महासंघ काठमाडौं शाखाले प्रेस काउन्सीलद्धारा गरिदै आएको पत्रपत्रिकाहरुको वर्गीकरण वैज्ञानिक, परादर्शी र न्यायोचित ढंगले गर्न पनि माग गरेको छ ।
