1 year ago
प्रधानमन्त्री एवं नेकपा (माओवादी केन्द्र) का अध्यक्ष पुष्पकमल दाहाल प्रचण्डले एमालेले संसद विघटन ठीक रहेको अभिमत दिएपछि आफुले नयाँ बिकल्प खोजेको बताउनुभएको छ ।
आठ दलको राष्ट्रपति निर्वाचन अभियान परिचालन र संयोजन संयन्त्रले बिहीबार काठमाडौंमा आयोजना गरेको सांसद अभिमुखीकरण कार्यक्रममा प्रचण्डले पुस २६ गतेको प्रतिनिधिसभामा एमाले अध्यक्ष केपी ओलीले संसद विघटन ठीक रहेको बिचार व्यक्त गरेपछि आफुहरु सोच्न बाध्य भएको र नयाँ बिकल्प खोजेको बताउनुभएको हो । उहाले विकास र समृद्धिको जनचाहना सम्बोधन गर्ने चाहना भएपनि बिचमा अलिकति अल्मलिएको र अव ठिक ठाउमा आएको धारणा राख्नुभयो । उहाले राष्ट्रपतिमा रामचन्द्र पौडेलको जीत सुनिश्चित रहेको र यो लोकतन्त्र र संविधानको हितमा रहेको बताउनुभयो । प्रधानमन्त्री प्रचण्डले पौडेलको पक्षमा आठ दलको मात्रै नभई १० दलको समर्थन रहेको र स्वतन्त्र सांसदहरुको पनि समर्थन रहेको बताउनुभएको कांग्रेस प्रवक्ता डा प्रकाशरण महतले जानकारी दिनुभयो । आठ दलले राष्ट्रपतिमा अघि सारेको उम्मेदवारका बिषयमा स्पष्ट पार्न अभिमुखी करण कार्यक्रम गरिएको उहाले बताउनुभयो । उहाले पौडलको पक्षमा अझै समर्थन बढ्ने दावी गर्नुभयो ।
त्यस्तै अभिमुखी कार्यक्रमपछि नेकपा एकीकृत समाजवादीका अध्यक्ष माधव कुमार नेपालले राष्ट्रपतिका कतव्र्य र जिम्मेवारीहरुको बिषयमा प्रस्टता आवश्यक रहेको बताउनुभयो । उहाले अवको राष्ट्रपतिले मुलुकलाई एकतावद्ध बनाएर जानुपर्ने भन्दै पौडेलको पक्षमा भोट दिने उल्लेख गर्नुभयो ।
त्यस्तै आठ दलका तर्फबाट राष्ट्रपति उम्मेदवार बन्नुभएका रामचन्द्र पौडेलले संविधानको परिधिभित्र रहेर आफुले काम गर्ने बताउनुभयो । उहाले अहिलेसम्म सवैदलबाट आफुलाई सहयोग गर्ने प्रतिवद्धता आएको बताउनुभयो ।
कार्यक्रममा कांग्रेसका सभापति शेरबहादुर देउवा, महन्त ठाकुर, अशोककुमार राई, राजेन्द्र श्रेष्ठ, बेदुराम भुसाल, रञ्जिता श्रेष्ठ लगाएतले राष्ट्रपतिमा भारी मतका साथ बिजयी गराउनुपर्ने धारणा राखेका थिए । राष्ट्रपतिको निर्वाचन आगामी फाल्गुन २५ गते हुँदैछ ।
