1 year ago
खाना पकाउन प्रयोग हुने ग्यास सिलिण्डर विस्फोट हुँदा नेपाली कांग्रेसका नेता एवं सांसद डा चन्द्रकान्त भण्डारी घाइते हुनुभएको छ ।
बुधबारराती काठमाडौंको बुद्धनगरस्थित आफ्नै निवासमा ग्यास सिलिन्डर विस्फोट भएपछि नेता भण्डारीसँगै उहाँकी आमा ८६ वर्षीया हरिकलासमेत घाइते हुनुभएको थियो । भण्डारीका आमा हरिकला भण्डारीको कीर्तिपुरस्थित कीर्तिपुर अस्पतालमा उपचारकै क्रममा निधन भएको छ । आमा हरिकलाको जीउको अधिकांश भाग गरी ७० प्रतिशतसम्म जलेको अस्पतालले जनाएको छ । यस्तै नेता भण्डारीको दुवै हात र दुवै गोडा गरी शरीरका २५ देखि ३० प्रतिशतसम्म भाग जलेको चिकित्सकले बताएका छन् । भण्डारीको श्वासनलीमा तातो हावा र धुवाको कारणले जलन भएको हुनसक्ने अत्यधिक सम्भावना रहेकाले देश बाहिर सुविधा सम्पन्न अस्पतालमा उपचार गर्न चिकित्सकले सुझाव दिएको स्वास्थ्यमन्त्री पदम गिरीले जानकारी दिनुभयो । उहाले सांसद भण्डारीको उपचारका लागि भारत लैजाने तयारी भइरहेको बताउनुभयो ।
भण्डारीका छिमेकी जनार्दन घिमिरेले राती पड्केको ठूलो आवाज आएको र उठेर हेर्दा ग्यास लिक भइ लागो लागेको देखेको बताउनुभयो ।
यसैबीच नेपाली कांग्रेस सभापति एवं पूर्वप्रधानमन्त्री शेरबहादुर देउवा, सभामुख देवराज घिमिरे, बिभिन्न दलका नेता लगाएतले कीर्तिपुर अस्पतालमा पुगेर भण्डारीको स्वास्थ्य अवस्थाका बारेमा जानकारी लिएका छन् ।
